Artêşa Amerîkayê stratejiyeke nû ya Parastina Hewayî û Mûşekî bi pêş dixe
PeyamaKurd – Artêşa Dewletên Yekbûyî yên Amerîkayê stratejiyeke nû ya parastina hewayî û mûşekî ragihand ku ji bo rûbirûbûna gefên dron û mûşekên çêkirî yên Îranê, ku di şerên Rojhilata Navîn û Ûkraynayê de bandor nîşan dane, hatiye amadekirin.
Tê payîn ku ev strateji, heta dawiya sala 2025an were weşandin, ku dê 3 bataryayên nû yên Patriot, 5 yekîneyên Parastina Agirê Nerasterast (IFPC), û 7 bataryayên dijî-dronan li xwe bigire.
Armanca vê stratejiyê avakirina pergalên bi hişê çêkirî û parastina modular e ku li gorî şerê sedsala 21an guncaw be.
Lîtnant General Sean Gainey, serokê Fermandariya Parastina Fezayî û Mûşekan a Artêşa Amerîkayê, di konferanseke li Huntsville, Alabama de got:
“Em dersan ji qada şer digirin û teknolojiyên nû yên bi hişê çêkirî bi tîrbûna hêzê re yek dikin.”
Stratejî li ser zêdekirina hejmara bataryayên Patriot bi sensorên LTAMDSê, ku şiyanên radarê xurt dikin, û yekîneyên IFPCê yên ji bo bêbandorkirina mûşek, roket, dron û guleyên hawanê hatine sêwirandin, disekine. Herweha, 7 bataryayên dijî-dronan dê li deverên stratejîk werin bicihkirin.
Li gorî Fermandariya Navendî ya Amerîkayê (CENTCOM), Îran xwedî nêzî 3,000 mûşekên balîstîk e, ku hin ji wan dikarin başûrê rojhilatê Ewropayê bigirin. Karbidest ditirsin ku bernameyên fezayî yên Îranê ji bo pêşxistina mûşekên balîstîk ên navparzemînî wek perde bêne bikaranîn.
Di Hezîrana 2025an de, mûşekên Îranê bajarên Îsraîlê yên Tel Avîc û Heyfayê hedef girtin, ku bû sedema 23 kuştî û zêdetirî 600 birîndar. Amerîkayê bi bataryayên THAAD û keştiyên Aegis piştgirî da Îsraîlê. Di heman demê de, dron û mûşekên Îranê di şerê Ûkraynayê û pevçûnên Deryaya Sor de gefeke mezin çêkirine.
Di Tîrmeha 2025an de, artêşa Amerîkî êrîşeke mûşekî ya Îranê li ser Baregeha Hewayî ya El Udeid li Qeterê têk bir, ku wekî “mezintirîn operasyona Patriot a dîrokê” hate binavkirin.
Wezîrê Parastinê Pete Hegseth ferman da ku fîloyeke dronên modern were pêşxistin da ku bersivê bidin taktîkên êrîşkar ên Îran, Rûsya û Çînê, û pêvajoyên bidestxistina leşkerî bileztir bikin.
Ev nivîs 88 car hatiye xwendin.
