Eşîrên Ereb piştgiriya xwe bo HSDê ragihandin: Doza me hevpar e

PeyamaKurd- Eşîrên Ereb ên li Rojavayê Kurdistanê piştgiriya xwe ya ji bo Hêzên Sûriyeya Demokratîk (HSD) ragihandin û destnîşan kirin ku di navbera wan û Kurdan de dozeke hevpar heye.

Eşîrên Ereb ên li herêmên kontrola Rêveberiya Xweser a Rojavayê Kurdistanê. bersiv dan spekulasyonên ku îhtimal e bûyerên xwînrêj ên li bajarê Siwêdayê, yên di navbera Durzî û Bedewiyan de li herêmên Rojavayê jî dubare bibin.

Şêxê Eşîra Şemeran Manî Hemîdî Deham el-Cerba diyar kir ku bûyerên li Siwêdayê bi rewşa Cizîrê re nayên girêdan û rola HSD û Fermandarê Giştî Mezlûm Ebdî di pêkanîna lihevkirina siyasî de gelekî bi qîmet e.

Rêberên eşîrên wekî Şemer, Cabûr û Welde tekezî li ser yekîtî û biratiya di navbera hemû pêkhateyên herêmê de kirin. Şêx el-Cerba da xuyakirin ku ji ber ku ew zarokên heman axê ne, wekî birayan ew xwedî dozeke hevpar in. Ev yek di daxuyaniya damezirandina HSDyê ya sala 2015an de jî hatibû destnîşankirin, ku HSDê xwe wekî "hêzeke leşkerî ya niştimanî ya hevpar ji bo hemû Sûriyeyiyan" pênase kiribû. Van gotinan helwesta eşîran nîşan dide ku ew li dijî her cûre fitne û dabeşkirinê ne.

Rûspiyên wekî Ekrem Mahşûş ez-Zuba ji eşîra Cabûr û Şêx Hamid el-Ferac ji eşîra Welde, piştgiriyeke xurt didin HSDê. Ez-Zuba tekez kir ku ew xwîna pêkhateyên Ereb, Kurd û Xiristiyan di têkbirina DAIŞê de tevlihev bûye û ew dê wekî gelekî yek bimînin.

El-Ferac jî got ku hemû eşîr û pêkhateyên Ereb bi HSDê re di nav piştevaniyê de ne, lewra HSD terorîzm ji holê rakiriye û ewlehiya herêmê diparêze. Ev gotin, li dijî her cûre hewldanên fitne û ne aramiyê ne.

 

Ev nivîs 143 car hatiye xwendin.