Brîtanyayê ceza li ser 11 kes û saziyên Rûsî sepand

PeyamaKurd- Brîtanyayê ji ber koçberkirina bi darê zorê ya zarokên Ukraynî, cezayên nû li ser 11 kes û saziyên Rûsyayê sepand. Wezareta Karên Derve ya Brîtanyayê ragihand ku zêdetirî 19 hezar û 500 zarok ji Ukraynayê bi darê zorê birine Rûsyayê yan jî herêmên ku Rûsyayê dagir kirine. Ev gav ji bo cezakirina kesên ku piştgirî didin vê polîtîkaya Rûsyayê ye ku hewl dide nasname, çand û dewleta Ukraynayê tune bike.

Rûsya, li gorî îstîxbarata Brîtanyayê, demeke dirêj e ku polîtîkayên rûskirinê li ser axa Ukraynayê ya dagirkirî dimeşîne. Bi vê yekê, Rûsya hewl dide ku nasnameya Ukraynî ji holê rake.

Cezayên nû yên Brîtanyayê, li ser wan kes û saziyên alîkariya vê polîtîkayê dikin hatine sepandin ku zarokên Ukraynî revandine, mejiyê wan şûştine û perwerdeya leşkerî dane wan. Di nav wan de 8 kesên payebilind û 3 saziyên girêdayî dewleta Rûsyayê hene.

Wezîrê Karên Derve yê Brîtanyayê, David Lammy, ev polîtîkaya Rûsyayê bi tundî şermezar kir û got ku ew "tirsonek" e. Lammy, anî ziman ku hewldana tunekirina nasname, ziman û çanda zarokan nayê qebûlkirin û got ku ti zarokek nabe piyonê şer. Brîtanya bi vê yekê, berpirsiyarên van sûcan tîne ber dadgehê û piştgiriya xwe ya ji bo Ukraynayê didomîne.

Ev nivîs 116 car hatiye xwendin.