Rubio: Trump wê li dijî rêxistinên 'narkoterorîst' şer bike
PeyamaKurd - Wezîrê Derve yê Amerîkayê Marco Rubio derbarê êrîşa li ser keştiyek ku ji Venezuelayê derdiket de daxuyaniyek da. Rubio got ku Trump wê li dijî rêxistinên 'narkoterorîst' şer bike.
Wezîrê Derve yê Amerîkayê Marco Rubio derbarê êrîşa li ser keştiyek ku tê îdiakirin ku ji Venezuelayê madeyên hişbir hildigire de daxuyaniyek da û got ku Serokê Amerîkayê Donald Trump wê li dijî rêxistinên 'narkoterorîst' şer bike.
Di civîneke çapemeniyê de li Meksîkayê, Rubio got, "Trump ew teqand. Û ew ê dîsa bibe. Dibe ku ev niha bibe. Ez nizanim. Lê mesele ev e ku serokê Dewletên Yekbûyî wê li dijî rêxistinên narkoterorîst şer bike. Ev rêxistin li avên navneteweyî dixebitî, ber bi Dewletên Yekbûyî ve diçû da ku welatê me jehrî bike û di bin deshilata Serok Trump de, ew roj bi dawî bûn." Rubio diyar kir ku hevkariya di navbera Dewletên Yekbûyî û Meksîkayê de gihîştiye astên bêhempa û serdana xwe wekî "pir berhemdar" bi nav kir.
Rubio wê di 2-4ê Îlonê de li Meksîka û Ekvadorê be da ku li ser bazirganiya madeyên hişbir, koçberî û aboriyê nîqaş bike.
Di civîneke çapemeniyê ya hevbeş de ligel Wezîrê Derve yê Meksîkayê Juan Ramon de la Fuente, Rubio got, "Ez kêfxweş im ku me gihîştiye astek dîrokî ya hevkariyê. Bi rastî, di heşt mehên dawî de, di dîroka welatên me de qet hevkarî di asta heyî de, bi rêzgirtina li yekparçeyî û serweriya her du welatan, nehatiye dîtin."
Rubio got ku serdana wî derfet da wî ku hevdîtinek dirêj û "pir berhemdar" bi Seroka Meksîkayê Claudia Sheinbaum û de la Fuente re bike.
Sheinbaum ragihand ku Meksîka û Washington li hev kirine ku Bernameya Hevkariya Sînor û Bicîhanîna Qanûnê ava bikin. Lêbelê, Serok diyar kir ku bername 'têgihîştinek' bê îmze bû, ji ber ku îmze wê wateyên siyaseta derve hebin.
