Wezîrê Îsraîlî: Êrîşên li ser Xezzeyê wê 12 Mehên din berdewam bikin
PeyamaKurd – Wezîrê Karên Stratejîk ê Îsraîlê Ron Dermer got ku ew ê êrîşên li ser Xezzeyê yên ku ji 7ê Cotmeha 2023an vir ve berdewam dikin, ji bo 12 mehên din bidomînin.
Li gorî televîzyona dewletê ya Îsraîlê KAN, Ron Dermer di konferansekê de li Orşelîmê îdia kir ku divê ew serkeftinê bi dest bixin, lê rave nekir ku ew serkeftin çi ye.
Dermer got, "Di nav 12 mehan de, şerê 7ê Cotmehê wê bi dawî bibe. Welatên din wê aştiyê bi Îsraîlê re bixwazin, lê mifteya vê yekê serkeftin e."
Dermer li ser pêvajoya danûstandinên di navbera Amerîka û Îranê de axivî û diyar kir ku ew bawer dike ku Serokê Amerîkayê Donald Trump wê peymanekê îmze neke ku ji bo Îsraîlê "xerab" be.
Ji aliyekî din ve, hate îdîakirin ku tîma danûstandinan a bi serokatiya Wezîrê Karûbarên Stratejîk ê Îsraîlê Dermer, wê îro êvarê li Qahîreya paytexta Misrê bi serokê îstîxbarata Misrê re di çarçoveya nûkirina agirbest û peymana pevguhertina girtiyan li Xezzeyê de bicive.
Rojnameya Israel Hayom, bi îşareta rayedarekî ewlehiyê yê Îsraîlê yê ku navê wî nehatiye eşkerekirin, ragihand ku Serokwezîrê Îsraîlê Benjamin Netanyahu plan dike ku di Cotmehê de şer bi dawî bike.
Ev nivîs 43 car hatiye xwendin.
