Tûzxurmatû | Cotkarên Kurd li dijî desteserkirina erdên xwe rabûn ser piyan
PeyamaKurd – Li gundê Taba Sûzê yê navçeya TûzXurmatûyê, cotkarên Kurd îro li dijî hewldanên desteserkirina zeviyên xwe yên çandiniyê ji bo berjewendiya malbatên Ereb, daketin qadan û nerazîbûna xwe nîşan dan. Ev pêngav, aloziya dîrokî ya li ser xwedîderketina li erd û zeviyan careke din anî rojevê.
Bingehê pirsgirêkê: Polîtîkaya Erebkirinê
Ev nakokî ne nû ye û bingehê wê vedigerin polîtîkayên Erebkirinê yên ku rejîma Be's di salên 1970 û 1980an de li deverên wekî Kerkûk, Xaneqîn, Mexmûr û TûzXurmatûyê bi rê ve birin. Di wê demê de, bi hezaran malbatên Kurd ji warên xwe hatibûn bidûrxistin û erdên wan bi awayekî fermî li ser malbatên Ereb ên ku ji deverên din ên Iraqê hatibûn anîn, hatin tomarkirin.
Dengê cotkaran: "Êdî sebra me nemaye!"
Cotkarên herêmê daxwaza parastina mafên xwe yên rewa dikin. Ako Xurşîdê yek ji cotkarên gund, ji Ajansa Nûçeyan a Şefaqê re axivî û got:
"Ev erd bi dehan sal in yên bav û kalên me ne, lê belê hewl tê dayîn ku bi awayekî fermî ji destê me bêne derxistin. Tevlibûna artêşê jî pirsgirêkê çareser nake, berovajî wê aloztir dike."
Xwepêşanderekî din, Pêştîwan Mihemed, hişyarî da û got,
"Me bi awayekî aştiyane daxwaza bidawîanîna van destdirêjiyan kir. Lê belê divê were zanîn ku êdî sebra gel nemaye. Heger hikûmet bi lez tevnagere, dibe ku rewş ji kontrolê derkeve."
Madeya 140em: Çareseriya ku nayê bicihanîn
Piştî rûxandina rejîma Sedam Husên ya di sala 2003yan de, ji bo çareserkirina van nakokiyan Madeya 140em a Destûra Iraqê hatibû amadekirin. Ev made pêvajoyeke sê-gavî (asayîkirin, serjimêrî û referanduûm) ji bo diyarkirina paşeroja van "herêmên nakokî li ser" pêşbînî dikir. Armanc ew bû ku guhertinên demografîk ên bi zorê hatine kirin, bêne sererastkirin.
Lêbelê, heta îro ev made bi temamî nehatiye bicihanîn û ev yek bûye sedema valahiyeke qanûnî. Niha cotkarên Kurd xwe dispêrin belgeyên xwedîtiyê yên beriya serdema Be'sê, li hemberî malbatên Ereb ku ew jî belgeyên fermî yên di wê serdemê de ji wan re hatine dayîn, weke delîl nîşan didin.
Ev nivîs 75 car hatiye xwendin.
